Kayat ita ti Department of Energy nga amyendaran ti Oil Deregulation Law tapno nabilbileg ti turay ti ahensia kontra iti fuel hoarding wenno panangidulin iti suplay ti langis ken mapapigsa ti seguridad iti suplay ti enerhia ti pagilian.
Segun ken ni Energy Secretary Sharon Garin, awan ti direkta a turayda iti salinong ti Downstream Oil Industry Deregulation Act of 1998 tapno kumpiskaren dagiti produkto-petrolyo a maatap a maiduldulin.
Nupay kasta, kayat ti ahensia a maikkan iti turay a mangkumpiskar kadagiti hoarded petroleum products ken mangipatungpal iti nadagdagsen a pannusa kadagiti aglabsing.
Iti gakat, nasken nga umabot iti P250-K agingga P500-K wenno pannakaibalud iti 6 a bulan agingga 2 a tawen ti pannusa kadagiti mapaneknekan a karaman iti fuel hoarding.
Naisingasing pay ti panangbilin kadagiti kompania ti langis a mapagtalinaed ti reserba ti fuel a katukad iti 60 nga aldaw a suplay.
