VIGAN CITY – Personal a bimmisita ni Israel Ambassador to the Philippines Ilan Fluss dagiti nagbalin a biktima ti bagyo Egay kadagiti dadduma a lugar iti Ilocos Sur.
Pinasangbayan ni Archbishop Marlo Peralta ni Ambassador Fluss iti Archbishop Palace ket napagpatangan dagti dua ti sitwasyon ti Israel iti baet ti mapaspasmak a riribuk kontra iti Hamas.
Ti panagturong ni Fluss idiay barangay Villamar iti ili ti Caoayan ket tapno kitaen dagiti nalayus a pagtaengan gapu ti bagyo.
Babaen iti Caritas Philippines ket nangted idi ti embahada ti Israel iti PHP250K kas pakauna a tulong kadagiti nalayus.
Nakasarita ken kinomusta ti opisial dagiti agindeg a recipient iti programa a nangikarianna a nayunanda iti tulong a naited iti nasao a barangay.
Saan a parikut ti kinapudot ti tiempo iti opisial tapno makiselfie kadagiti ubbing.
Ti Villamar ti maysa kadagiti coastal barangay iti ili ti Caoayan a kangrunaan a pagbibiagan ket ti panagkalap.
