VIGAN CITY – Nasurok pito ribo ti bilang dagiti enrollees ita nga school year 2024-2025 iti Ilocos Sur National High School.
Iti pannaki-uman ti Bombo Radyo Vigan ken ni Editha Bagcal, Principal IV ti ISNHS, 7,909 ti bilang dagiti new enrolless, nabab-baba no yarig iti dati nga 8,332 ngem adda pay laeng dagiti manarimaan nga agen-enrol.
Adda dagiti baro nga special programs nga idiaya ti pagadalan kadagiti enrollees ita a tawen kas ti Special Program in Arts, Special Program in Foreign Languages Specializing Chinese Mandarin, Special Program in Journalism -English and Filipino ken dadduma pay.
Dagiti kayatna ti agapply ket masapul laeng nga adda gradoda nga 80 agpangato.
Aggapu met laeng iti ISNHS dagiti agisuro kadagiti foreign language ta adda dua nga teacher scholar a nagadal iti nasao a banag a maisuroda kadagiti agad-adal.
Balakad ni Bagcal kadagiti kumamakam pay nga agenrol ta masapul nga itugotda ti PSA birth certificate ken card ti ubing a mayenrol.
Kabayatanna, naannayas met ti panaglukat ti klase ita nga aldaw ta saan unay a naapektaran ti pagadalan manipud iti naglabas nga epekto ti bagyo Carina ken habagat.
