VIGAN CITY- Php220,000 pesos iti na-invest ni Marlon Somera, maysa kadagiti limapulo a nabiktima ti Farm to Market Paalaga System.
Iti pannaki-uman ti Bombo Radyo Vigan ken ni Somera, naallukoyda iti nasasam-it a sarita ken ti advertisement ti Branch Manager ti nasao a kompania a ni Claire Singson iti maysa FM Radio Station.
Malaksid kadagiti inkari ti Branch Manager, naallukoyda pay iti kinuna ti suspek a saanna kayat a marugitan ti pelyedon.
Ti Farm to Market Paalaga System ket isuda iti makaamo kadagiti bitamina ken dadduma pay a kasapulan ti dingwen a baboy agingga a mailako, ken tapno maliklikan iti saan a pagkikinnaawatan dagiti agkakarruba gapu iti angot ti ibleng ti baboy.
Gapu dayta, nag-invest ti biktima ti Php100,000 nga adda pay uppat a libre a buryas idi damo, ken ti maikadua ket Php50,000, malaksid pay kadagiti manok a nagpuonanna.
Segun kenni Somera, namnamaenda a maawatda ti profit wenno inpuonanda iti bulan ti Agosto, idinto a dagiti manok ket idi koma pay laeng bulan ti Hulio, ngem kari laeng ti naawatda.
Idi adda parikut ti nadakamat a kompania, dita da laeng a natakuatan a dagiti inpuonanda a para iti dingwen ket napan iti cellphone repair ken car accessories, isu a nagduaduadan.
Innayon pay ti biktima nga uray no adda ti probleman ket agtultuloyda latta nga agaw-awat iti investors.
Gapu ti pasamak, nagpatulongda kenni Vice Governor Ryan Singson a mangala ti abogado para iti hustisya ta itan ket saanen a mabirukan ti founder ti kompania, ken inamin ni Claire Singson a capital laengen ti maisubli kadakuada.
Kabayatanna, mapatta-patta nga umaboten iti Php15 million agingga Php20 million ti nai-invest dagiti padada a biktima ti farm to Market Paalaga System ditoy probinsia ti Ilocos Sur.
