Agtultuloy a mapadpadur-as ti industria ti Wagyu beef iti ili ti Tagudin, Ilocos Sur kas baro a pagbiagan para kadagiti mannalon ken dagiti agtartaraken iti dingwen.
Iti pannaki-uman ti Bombo Radyo Vigan ken ni Roberlinda Lacasandile, Chairperson ti Umok ti Wagyu, narugianen ti panag-breed iti Wagyu cattle gagemda a mapaadu dagiti Wagyu beef ta pudno nga agkurkurang ti suplay.
Kalikagum pay ti Local Government Unit ti Tagudin a pagbalinen ti nasao nga ili kas sentro ti Wagyu production iti Amianan a Luzon.
Kabayatanna, pinasingkedan met ni dati a Tagudin Mayor Jun Verzosa nga adayo a nangin-ngina ti presyo ti Wagyu cattle ngem iti normal a baka isu nga ad-adu nga amang ti maganansya dagiti agtaraken.
Nainget met nga inadal ti Municipal Veterinary Office ti Tagudin ti breeding process babaen iti tulong ti dati a mayor.
Manamnama a makaited daytoy iti nayon a pastrek, trabaho, ken gundaway para kadagiti agindeg, kagiddan ti pannakapadur-as ti merkado para iti de-kalidad a karne ti baka.
