Pinasingkedan ti Philippine National Police (PNP) a manipud Enero agingga iti Nobiembre 8 ket bimmaba ti index crimes ditoy pagilian iti 13.51%.
Segun kenni PNP Spokesperson Police Brigadier General Jean Fajardo, 30,322 nga insidente ti index crimes ti nairekord kabayatan ti nadakamat a panawen.
Nababbaba daytoy no iyarig iti 35,057 a nairekord bayat ti isu met laeng a panawen idi napan a tawen.
Karaman kadagiti krimen a bimmaba ket ti murder, homicide, physical injury, rape, theft, robbery, vehicle theft ken motorcycle theft.
Mainaig iti daytoy, impakaammo pay ni Fajardo a bimmaba met iti 5.75% ti kaso ti cybercrime ditoy pagilian iti maikatlo a kuarter ti tawen
Segun kenni Fajardo, ti agtultuloy a panagbaba dagiti insidente ket gapu kadagiti polisia nga ipatpatungpal ti PNP kas iti intensified police visibility, intelligence-driven operations, community-based programs, ken panagtitinnulong kadagiti dadduma nga ahensia ti gobierno.
