VIGAN CITY – Nabang-aran ti ina dagiti agkabsat a biktima iti pammapatay idi August 16 idiay Brgy. Maynganay Norte, Sta. Maria ta nakemmegen ti maysa kadagiti suspek a ni Roberto Gapusan, agtawen ti uppat a pulo ket walo, maysa a seaman ken agnaed idiay Sitio Darurog, Maynganay Norte, Sta. Maria idi naminsan nga aldaw.
Ti suspek a ni Gapusan ket sumangango ti dua a bilang ti kaso a murder gapu iti pannakatay da John Glenn ken ni Johannes Paul Taguibao.
Segun ti ina dagiti biktima a ni Lulu Taguibao, pagyamananna dagiti amin a timmulong nangruna kadagiti kameng ti linteg ta dakkel a banag para kenkuana a maipaayan ti hustisiya iti pannakatay dagiti annakna.
Ti agdama, burburtia pay laeng kadagiti otoridad, pakairamanan iti pamilia ti biktima no apay a pinatay ti suspek dagiti biktima.
