Manamnama a maituloy inton sumaruno a lawas ti panagdenggeg ti Senate Blue Ribbon Committee iti mapapati nga anomalia iti flood control projects.
Segun ken ni Blue Ribbon Committee Chair Sen. Erwin Tulfo, posible a maisayangkat ti panagdenggeg inton Huebes wenno Biernes, depende iti agbalin nga availability dagiti hearing room iti Senado.
Kinuna ni Tulfo nga ur-urayen pay ti komite ti panagipasa ni Sen. Panfilo Lacson kadagiti dokumento nga adda pakainaigan iti mapapati a ghost project idiay Taguig City a posible nga agserbi a pagbasaran ti panangtratar iti isyu.
Malaksid dayta ket plano pay nga imbitaran ti komite ti sangapulo ket walo a bodyguards a mapapati nga adda impormasyonna maipanggep kadagiti alegasyon, kalpasan a nagsaritada a nakasaganada a sumango iti Senado.
No pay kasta, kinuna ti senador a simpaen pay ti komite iti affidavit-da tapno mabigbig no adda dagiti baro nga impormasyon a maitedda.
Kinunana a dagiti alegasyon ket kapada met laeng kadagiti kaso a nakapenpen iti Ombudsman ken Department of Justice, adalen pay ti Blue Ribbon Committee no kasano iti sakup iti imbestigasyon tapno saan a madoble iti proseso.
