Indaulwan ni Ilocos Sur Police Provincial Director Police Colonel Darnell Dulnuan ti Simultaneous Launching iti PNP-COMELEC Checkpoint idiay Tagudin, Ilocos Sur.
Paset iti aktibidad ti napabileg a tignay ti PNP a mangipatungpal kadagiti election-related laws ken siguraoden ti natalged ken naurnos a pannakaiwayat ti umadani nga eleksyon.
Iti pannaki-uman ti Bombo Radyo Vigan ken ni Dulnuan, katinnulongda dagiti law enforcement agency, COMELEC, ken ti publiko a mangipatungpal iti nasao nga addang a ti gagemna ket mamonitor ken malapdan ti iligal nga igam, pampabettak ken dadduma pay a kontrabando, kasta payen iti pannakatiliw dagiti aglabsing iti gun ban ken dadduma pay nga election-related offenses.
Impaganetget ti opisial ti kari ti ISPPO a mangpatalinaed iti kapia ken seguridad iti probinsia kabayatan iti election period.
Nupay kasta, pinalagipanna dagiti agdalyasat kadagiti kalsada a sumurot iti patakaran ti checkpoint.
