VIGAN CITY – Manamnama nga inton October 21 iti panagsubli iti operasyon ti Ilocos Sur Musical Dancing Fountain kalpasan iti temporaryo a pannakaisara na kas paset ti regular maintenance.
Segun ken ni Dante Tacata, mangidaulo iti Ilocos Sur Musical Dancing Fountain, nadelay iti pannakaileppas da iti agtinawen a maintenance ti dancing fountain uray nu nasapa a naipaserra idi napalabas a bulan gapu iti panagtudtudo na idi.
Inpasigurado ni Tacata a ngan-ngani malpasen ken ngan-ngani da maikkaten dagiti lumot kadagiti tubo ti dancing fountain, kasta pay a ngan-ngani da matarimaanen dagiti adda leak na a pump ken dagiti napundi a silaw na.
Uray pay nu October 21 iti patta-pattaen da a pannakaileppas iti regular yearly maintenance ti dancing fountain iti probinsiya, ikarkarigatan da nga isapsapa pay tapnu maikamakam kadagiti aktibidad iti syudad tapnu adda nayon a pagpasyaran dagiti turista.
