VIGAN CITY – Naidalan iti Modified Enhanced Community Quarantine iti intero nga ili ti Tagudin kas maibasar iti Executive Order No. 46 Series 2020 a pinirmaan ni Governor Ryan Singson.
Ti MECQ ket nangrugi idi rabii nga agpaut agingga inton December 14 wenno depende nu maikkatto met laeng.
Ti nasao nga addang ket gapu iti sangapulo ket dua manipod iti duapulo ket dua a nairekord a kaso iti covid-19 iti probinsia ket nagtaud iti ili ti Tagudin iti uneg laeng iti lima nga aldaw.
Gapu iti panagado iti kaso iti virus iti nasao nga ili ken ti pannakakumpirma iti local transmission ket nakaalarmaan ti medical team iti ilocos Sur isu a nairekomenda iti panangsukat ti LGU manipod ti MGCQ a maidalan iti MECQ tapno ma-contain iti virus.
Pinasingkedan ni Tagudin Mayor Roque Verzosa iti pannaki-uman ti Bombo Radyo Vigan nga idi adda iti natay a probable case iti ili a masakupanna ket naalarmadan isu nga indalanda iti critical zone ken ingiddandan iti advisory tapno malimitaran iti tignay tapno saan nga agwaras iti covid-19.
