Kinondenar ti Independent Commission for Infrastructure (ICI) dagiti report a nakaru a panagdadael ken pannakibiang dagiti opisyal a dokumento mainaig kadagiti kwestyunable a proyekto iti flood control iti Department of Public Works and Highways.
Segun ken ni ICI Chairmain ken retired Supreme Court Associate Justice Andres Reyes Jr., ti naaramid ket nakaru a lapped iti imbestigasyon ken panaglabsing iti karbengan iti publiko iti transparency ken panagsungbat.
Binallaagan ni Reyes iti siasinoman a mangdadael, mangpeke wenno mangilemmeg kadagiti dokumento ket mabalin a madusa iti salinong iti linteg.
Inallukoyna iti amin nga opisyal ken empleado ti DPWH a makitinnulong ken siguradoen a kompleto dagiti dokumento nga iggemda.
Kinumpirmaran ni DPWH Secretary Vince Dizon iti panangpeke ti dokumento ti maysa nga empleado, maibasar iti pakaammo ni ICI special adviser ken Baguio City Mayor Benjamin Magalong.
Napilaan metten iti pormal a kaso ken siam a pulo nga aldaw a preventive suspension ni Rene Zarate a DPWH district engineer iti Baguio City.
Nangiruar pay ni Dizon iti memo a mangbilbilin iti amin nga opisina iti DPWH manipod central agingga ditrict a pagtalinaeden ken ipasa iti ICI amin a dokumento mainaig kadagiti proyekto iti imprastraktura iti napalabas a sangapulo a tawen, ket binallaaganna a dagiti saan a sumurot ket sumango iti kaso ken suspension.
