Pinagkedkedan ti International Criminal Court (ICC) ti kiddaw ti kampo ni dati a Pres. Rodrigo Duterte a maala ti pribado a komunikasyon iti nagbaetan ti Registry iti korte ken dagiti independent medical expert a nangadal ti baelna a sumango iti proceedings.
Ti pangngeddeng a napetsaan idi December 23, 2025, kinuna ti ICC Pre-Trial Chamber 1 a napaay ti depensa a paneknekan ti kasapulan para iti insigida a panangibutaktak dagiti email, surat ken rekord ti panagsarita iti nagbaetan ti Registry ken medical panel.
Segun ti korte, ti Registry ket maysa a “neutral organ” nga agserserbi a tagabaet laeng kadagiti instruksyon kadagiti eksperto.
Innayon ti ICC nga iggemen ti dependa iti amin nga impormasyon a kasapulanda pakairamanan dagiti dokumento a naipatulod iti panel.
Pinasingkedan pay dagiti korte a nalawag kadagiti report dagiti eksperto a naipatulod idi December 5, 2025 dagiti materyales ken pannarabay a naaramat iti panagadal.
Immunan nga naibilin ti medical examination kalpasan a nagkiddaw ti kampo ni Duterte iti indefinite adjournment dagiti panagdenggeg.
Nagpanawagan met ti Office of the Prosecutor nga ituloy ti proceedings ket impaganetgetda nga agpampammarang ni Duterte ti cognitive impairments a maysa a pammabasol a pinaglibakan iti depensa.
Ni Duterte ket agdama a nakabalud iti ICC detention center idiay The Hague ken sumangsango kadagiti kaso a crimes against humanity maipanggep ti extra-judicial killings iti war on drugs-na.
