Dismayado dagiti survivor ni Jeffrey Epstein kalpasan nga inruar iti gobierno iti Amerika ti nasurok tallo a million a dokumento maipanggep ti kaso ti natay a sex offender.
Segun kadakuada, agtaltalinaed nga aglemlemmeng ken masalsalakniban dagiti suspek idinto nga adda dagiti impormasyon a mabalin a mangbigbig kadagiti biktima.
Impaganetget ti US Department of Justice a saan nga imimpluwensyaan ti White House ti imbestigasyon ken panagruar dagiti dokumento ken pinaglibakan ni Deputy Attorney General Todd Blanche nga adda naikkat a sensitibo nga impormasyon tapno salakniban ni US President Donald Trump.
Naduktalan kadagiti dokumento ti nagan iti sumagmamano a nabileg a personalidad pakairamanan da Trump, Elon Musk, Bill Gates ken dati a UK Prince Andrew, no man pay uray maysa kadakuada ket awan ti pormal a naakusaran maipanggep ti krimen.
