Saan laeng nga iti pammabasul a grave threats a nasken a paayaban kas testigo ni Atty. Zuleika Lopez, chief of staff ni Vice President Sara Duterte.
Iti pannaki-uman ti Bombo Radyo Vigan ken ni Atty. Dino De Leon, maysa a human rights advocate, kinunana a saan a maibilang a gagangay nga aide laeng ni Lopez ta maysa daytoy kadagiti kaasitgan nga opisial iti bise presidente.
Segun ken ni De Leon, nasken a tumestigo ni Lopez kadagiti dadduma pay nga alegasion iti impeachment complaint, agraman ti bribery ken korapsion.
Kinunana pay nga arigna aglanglanga a natangsit ti panangdakamat ni Lopez iti “Prepare for Typhoon Inday” kagiddan ti panagbisitana iti Senado idi kalman.
Impaganetget ni De Leon a ti namnamaen ita ti publiko ket panagpakumbaba ken panangilawlawag kadagiti seryoso nga alegasion a sangsangwen ni Duterte.
Patienna a no agtultuloy ti kastoy a maipakpakita iti publiko, ket posible nga agbalin a counterproductive wenno makapadakes iti biangda iti baet ti impeachment proceedings.
