Kiniddaw ti House prosecution panel iti Senate impeachment court iti 62 trial dates tapno maipresentar dagiti ebidensyada ken saksi iti impeachment case kontra ken ni Vice President Sara Duterte.
Segun ken ni House legal spokesperson Atty. Benjamin “Jay”Tolosa Jr., nakabasar ti kiddaw iti kaadu dagiti saksi ken ebidensya a nakalista iti pre-trial brief.
Kabayatanna, 30 trial dates laeng ti kidkiddawen ti kampo ti depensa wenno kampo ni VP Sara.
Inlawlawag met ni Tolosa a saan a kayatna a sawen nga umabot iti innem a pulo nga aldaw ti trial ta mabalin a makissayan no ipalubos ti korte ti panagdenggeg iti nasurok maysa a saksi kada aldaw.
Kinunana pay nga adda siam a pulo ket pito a saksi a nakalista iti depensa pakairamanan iti limapulo ket maysa a saksi a kapada iti adda iti listaan ti prosecution.
Malaksid dayta ket 248 manipod 276 nga ebidensya iti prosecution ti karaman kadagiti ebidensya nga impasa ti depensa.
Ti pinal a bilang ti trial dates ket ituding ti Senate impeachment court iti mairuar a pre-trial order.
