VIGAN CITY – Matamtaming idiay Ilocos Sur Provincial Hospital – Gabriela Silang ti lalaki nga agtawen ti 34 a driver ti Maria De Leon bus line a maibilang a highly probable case ti coronavirus disease 2019 (COVID-19) ditoy probinsiya.
Dayta ti maysa kadagiti kinumpirmaran ni Gov. Ryan Singson idi naisayangkat ti press briefing inaig ti sitwasyon ti COVID-19 outbreak ditoy probinsiya idi rabii.
Idi alas kwatro iti agsapa idi March 15 a simmangpet idiay San Vicente, Magsingal ti nasao a pasyente ket idi March 16, naguyek ken nagsakit ti ulo na agingga nga idi March 22 ket nagngato payen iti gurigor na ken narigayan nga aganges.
Naipan ti pasyente idiay Ilocos Sur District Hospital, Magsingal ngem gapu ta kimmaro ti kasasaad na, naiyalis idiay Gabriela ket na-CT scan ti barukong na.
Maibasar iti resulta ti CT-Scan na a naiparuwar idi March 23, ti pasyente ket agsagsagaba ti bilateral pneumonia suggestive of classic covid-19-moderate degree babaen ti British Society of Thoracic Imaging guidelines.
Malaksid iti dayta, maibasar iti official statement ti Philippine College of Radiology, ti resulta ti CT Scan ket documented to be more sensitive than gene sequencing.
Agsipud iti dayta, naideklerar ti extreme enhanced community quarantine idiay Barangay San Vicente, Magsingal ket awanen iti mapalubusan a sumrek ken rumwar iti nasao a barangay ken amin a bumaranggay ket masapul nga istrikto a suruten da ti home quarantine.
Mainaig dayta, nangisayangkaten dagiti health official iti contact tracing kadagiti nakapulapol ti pasyente ken nabriefing-dan iti aramidenda.
Ti agdama mayururay iti confirmatory test ti nasopharyngeal ken oropharyngeal swab ti pasyente tapnu mapaneknekan nu agsagsagaba ti COVID-19 wennu saan.
