VIGAN CITY – Naballigi iti naisayangkat nga Anti-Illegal Drug Operation kontra ken ni Joel Agbisit, agtawen ti uppat a pulo ket tallo, baro, emplyado iti LGU Magsingal, Drug Surrenderer nga agnaed idiay Sta. Monica, Magsingal idi kalman idiay Brgy. San Pablo, Sto. Domingo.
Iti pannaki-uman ti Bombo Radyo Vigan ken ni PCapt. Christopher Ramat a hepe ti Sto. Domingo Municipal Police Station, resulta iti follow-up operation-da iti pannakakemmeg ni Agbisit idi napalabas a lawas nga isu iti source-na nga agnaed idiay Magsingal.
Segun ken ni Ramat, naka-duty ni Agbisit idi nakemmeg ta mapapati a mapan laeng koma a agideliber ngem nakemmegda iti nasao a lugar.
High Value Individual, RPDEU COPLAN ken PDEA Target List ti suspek ken datin a nakemmeg ti suspek idi tawen 2016 gapu panaglabsing met laeng iti Sec. 5 iti RA 9165.
Pinasingkedanna pay a saanen a nagun-uni ti suspek idi nakemmeg ta inyawatna dagiti kontrabando nga adda kenkuana.
Naala ken ti suspek iti maysa a transparent plastic heat sealed sachet a naglaon iti mapapati a shabu a nagserbi a buy bust item, innem a transparent plastic heat sealed sachet a naglaon iti mapapati a shabu a nagserbi a possession a mapatta-patta nga agdagsen iti 7.9 a gramo nga aggatad iti 57,600 a pisos.
