VIGAN CITY- Natamaan ti tear-gas ni Kenyan Activist Auma Obama, half-sister ni dati a US President Barack Obama, iti ruar ti parliament building idiay Nairobi.
Nagapaputok dagiti polis kadagiti demonstrators a nangpadas a sumrek iti Kenya Legislature, a gapuanan ti pannakatay dagiti innem a tattao, nakadunoran dagiti dadduma, ken pannakauram dagiti paset ti parliament building.
Napasamak ti panagprotesta gapu ti panangipasa dagiti agpapanday-linteg a mangingato iti buis.
Maibasar iti singasing, adda 16% a mainayon a buis iti tinapay ken 25% a buis kadagiti cooking oil.
Malaksid iti kabesera a Nairobi, sumagmamano met a protesta ti mapaspasamak iti dadduma a paset ti Kenya.
Depensa ti gobierno ket napateg ti panagngato ti buis tapno maksayan ti utangda.
