Patien ti kaddoan a panag-hack iti napasamak idiay Europa nu apay a nagpaut iti mano nga oras iti panagawan iti suplay ti kuryente.
Iti pannaki-uman ti Bombo Radyo Vigan ken ni Bombo International News Correspondent Eva Tinaza nga adda idiay Spain, numan pay saan pay nga ammo ti presidenteda iti pudno a rason nu apay a nagawan iti suplay ti kuryente iti umabot sangapulo nga oras idi naminsan ket adu iti mamati nga adda napasamak a panag-hack isu a napukaw iti suplay.
Buteng iti nariknada idi nakasalawda iti adu a polis kadagiti kalsada ta mapapati nga adda sapsapulenda a mapapati nga akin-aramid iti panagawan ti suplay ti kuryente.
Segun ken ni Tinaza, saanna a ninamnama a dakkel iti epekto idiay Europe nu mapukaw iti suplay iti kuryente ta ita laeng a napasamak dayta ta masansan nga agpaut laeng iti lima agingga sangapulo a minutos nu mapukaw iti suplay.
Inlawlawagna a nagsarra iti mano nga oras dagiti bus ken train station ket idi nagsubli iti operasyon ket umabot iti limagasut agingga sangaribo a tattao iti agur-uray nga aglugan isu a napilitan payen a nagnagna iti uneg iti innem nga oras manipod iti pagtaenganna agingga iti central Spain.
Gapu pay iti pasamak ket adu dagiti pagadalan iti nagsuspenso iti klase ken uray dagiti dadduma a pagtrabahoan ket adda dagiti nagsarra ta naapektaran iti operasyonda.
