VIGAN CITY – No man pay inbaga ni Presidente Rodrigo Duterte a maipaayan ti tulong pinansyal dagiti tattao iti kangitingitan ti Enhanced Community Quarantine, pinasingkedan ni Assistant Regional Director Freddie Lazaro ti Philippine Information Agency a maiur-uray paylaeng ti pagannurutan nga iyetnag ti Department of Social Welfare and Development a masurot tapnu maited kadagiti tattao iti tulong para kadakuada.
Kiddawen ni Lazaro ti anus dagiti agindeg ditoy probinsia ket saanda nga agdardaras no di ket iyurayda ti tulong a sumangpet gapu ta saan nga insigida ti agirwar ti pondo manipud iti gobyerno.
Malaksid iti dayta, insingasingna nga agbirokda ti sabali a pagsapulan wennu pamastrekan ta saan pay a masigurado no kaano iti panagpatingga iti krisis a sangsangwen tatta iti pagilian.
Kabayatanna, kinontra ni Lazaro ti agdinamag a mapawaywayan ti enhanced community quarantine ditoy probinsia ta iti nasao a banag ket nakadepende iti sitwasyon.
