VIGAN CITY – Imbilin ni Narvacan Mayor Pablito V. Sanidad Sr. a masuspenso ti trabaho ita nga aldaw gapu iti walo nga oras a brownout.
Segun ken ni Mayor Sanidad, saan pay a naileppas ti pannakatarimaan ti generator set iti ili isu a nasaysayaat a masuspensp ti trabaho tapno maliklikan ti panagsagaba dagiti empleado iti heat stroke ken iti dadduma pay a sakit a patauden ti nalaus a kinabara ti panawen.
Inlawlawag ti mayor nga agtuloy ti operasion dagiti departamento nga adda pannakainaigna iti pannakaideliber dagiti kangrunaan a kasapulan kas iti “basic and health services, preparedness/response to disasters and calamities” ken dagiti dadduma pay a departamento a kasapulan ti serbisioda.
Ti pannakasuspenso ti face-to-face classes ken ti trabaho kadagiti pribado a kompania, maited ti diskresion nga agdesision kadagiti mangidaulo kadagiti maseknan a pagadalan wenno kompania.
Kinuna ti ISECO a maisayangkat ti brownout kas paset ti tinawen a preventive maintenance ti Narvacan sub-station ken pannakasimpa dagiti linia ti koriente kadagiti ili a masakupan ti ssub-station a pakairamanan ti Narvacan, Nagbukel, Sta. Maria, Burgos (malaksid iti Mapanit ken Bessang) ken iti Sitio Patpat, Poblacion Norte, Lidlidda.
