Sinuspenso iti Malakanyang ti serrek iti amin nga opisina iti gobierno manipod December 29, 2025 agingga January 2, 2026 para iti napapaut a bakasyon ita a holiday season.
Kasaruno dayta iti Memorandum Circular No. 111 a pinirmaan ni Executive Secretary Ralph Recto iti salinong ti bileg ti presidente.
Maibasar ti memorandum, gagem ti addang nga ikkan ti umdas a panawen dagiti empleado iti gobierno tapno rambakan iti Baro a Tawen ken makabiahe nga agawid kadagiti probinsiada.
No pay kasta, agtultuloy ti operasyon dagiti ahensya a mangmangted ti kangrunaan a serbisyo kas ti health services ken dagiti opisina nga adda pakainaigan ti kinasagana ken panagtignay ti didigra.
Kabayatanna, desisyon dagiti mangidaulo iti pribado a kompania ken opisina no mangipatungpalda ti work suspension kadagiti nasao nga aldaw.
