VIGAN CITY – Maal-alarma ni Governor Jerry Singson kadagiti nagsasaruno a pannakakita dagiti mangngalap iti probinsia kadagiti pakete ti shabu iti kabaybayan.
Iti pannaki-uman ti Bombo Radyo Vigan ken ni Gov. Singson, nakasaritanan ti provincial director ti kapulisan a makikammayet iti dadduma nga ahensia ti gobierno a mangtakuat iti adda iti likudan ti insidente.
Patien ti gobernador nga adda ti rason no apay nga adda dagiti madukduktalan nga iligal a droga isu a kayatna a maamoan no dagitoy ket adda nangiranta a nangibati wenno naisanglad laeng iti kabaybayan.
Kiddaw ti ama ti probinsia ti panagkaykaysa ti amin nga Ilocosurians a tumulong kadagiti otoridad a mangduktal kadagiti konektado iti insdiente ken ti panagkaykaysa a salwadan ti probinsia kontra kadagiti manggangandat a mangdaddadael iti pintas ken kapya iti intero nga Ilocos Sur.
Kabayatanna, dayawen ni Gov. Singson dagiti mangngalap a nangipaima kadagiti otoridad dagiti nakitada nga iligal a droga ket kiddawna nga amin a mangngalap iti probinsia ket tuladenda ida no adda makitada a droga a tumpaw iti kabaybayan a sakupen iti lugarda.
