Imbilinen ni Ilocos Sur Governor Jerry Singson ti pre-emptive evacuation kadagiti posible a maapektaran iti bagyo Paolo iti probinsia.
Dayta ket kagiddan a naibayog dagiti sumagmamano a lugar ti probinsia iti Tropical Cyclone Wind Signal No 4.
Iti pannaki-uman ti Bombo Radyo Vigan ken ni Governor Singson, ti panangibilinna iti nasao nga addang ket tapno makasagana dagiti agindeg ken saanda a maisagmak.
Nagpalagip pay ti gobernador kadagiti agindeg nga isaganada dagiti pagtaenganda ken idulinda dagiti tarakenda tapno maliklikan a posible a pannakayanudda.
Dagiti met mangngalap ket nabilin a saanda pay laeng nga agturong iti taaw gapu iti nadawel a dalluyon.
Kabayatanna, nakasagana ti Ilocos Sur Provincial Government, agraman ti Provincial Disaster Risk Reduction and Management Office ken dagiti Local Government Unit iti posible nga iduduprak ti bagyo iti probinsia.
Immunan a sinuspenso ti gobernador ti klase iti amin a lebel kadagiti pampubliko ken pribado a pagadalan, kasta payen ti trabaho kadagiti government offices malaksid laeng kadagiti mangipapaay iti essential services.
