Plano ti gobierno nga agpatakder ti maysa nga oil reserve storage sakbay a malpas iti 2027 wenno iti umuna a paset iti 2028 tapno makissayan ti epekto ti nakaru a panagpangato ti presyo iti langis ken posible a pannakaitantan ti suplay ti krudo.
Iti panagdenggeg ti Senate Committee on Energy, kinuna ni Energy Secretary Sharon Garin nga umabot iti nasurok-kumurang makatawen ti konstruksyon ti pasilidad nga adda kapasidadna a maysa a milion a bariles iti langis.
Segun ken ni Garin, posible dayta a makompleto iti agdama nga administrasyon pakairamanan ti pannakaala ti permit, panagangkat dagiti alikamen ken dadduma pay a kasapulan a proseso.
Mapatta-patta nga umabot iti P5 billion ti gatad ti proyekto isu a makikamkammayeten ti Department of Energy ken Philippine National Oil Company iti Maharlika Investment Corporation para iti pondo.
Impaganetget ni Garin a napateg ti kaadda ti bukod nga oil reserve iti pagilian kas paset ti national security, kangrunaan iti baet ti agtultuloy a panagpangato ti presyo iti langis gapu iti naglabas a krisis idiay Middle East.
