VIGAN CITY – Adda dagiti alcohol a maiwaras iti tunggal barangay idiay Narvacan nga aramaten dagiti bumarangay kas disinfectant tapnu maliklikan ti coronavirus disease 2019 (COVID- 19) a kas ingunam-gunam ni dati nga Ilocos Sur governor ken agdama a Narvacan Mayor Luis Chavit Singson.
Segun ken ni Singson, saan nga ang-angaw ti sangsangwen tatta iti intero a lubong inaig ti nasao a sakit isu a masapul ti naan-anay a pannakitinnulong ti tunggal maysa nangruna kadagiti opisial ti barangay nga isuda ti maseknan a mangmonitor kadagiti agsangpet a kalugaranda ta masapul a mai-quarantine da uray no saanda nga umannugot ken binalakadanna met dagiti kailianna a liklikanda ti mapan kadagiti pampubliko a lugar ken napateg ti kanayon a panangpatalinaedda a nadalus ti bagida ken aglawlawda.
Kagiddan iti pannakaisanud dagiti nadumaduma nga event ket kunana nga agtultuloy latta ti panagtataripnong dagiti opisial ti ili ken barangay tapno mapagsasaritaanda dagiti naan-anay nga addang kontra iti nasao a sakit.
Kabayatanna, kiddawen ti mayor kadagiti aglaklako kadagiti medical supply a kas koma ti thermal scanner a saanda nga ipangina agsipud ta saanda a makatulong no di ket irurumenda laeng dagiti tao.
