Inallukoy ni Senador Sherwin Gatchalian ti gobierno nga aramaten ti contingency fund ti Presidente para iti dagus a pannakaipaay ti fuel subsidy iti drayber ti Public Utility Vehicle iti baet ti kumarkaro a rinnupak iti Middle East.
Segun ken ni Gatchalian, nakailanad iti linteg a mabalin nga aramaten ni Presidente Ferdinand Marcos Jr., ti contingency funds tapno punwan ti panangted iti ayuda kadagiti PUV driver a sigurado a maapektaran iti panagpangina ti langis.
Iti salinong ti programa a Pantawid Pasada, ti panangipaay iti subsidiya kadagiti benepisyaryo ket nakadepende iti iruar a sertipikasion ti Department of Energy a ti aktwal nga average a presio ti Dubai crude oil iti maysa bulan ket umaboten iti $80 kada bariles.
Inallukoy pay ti senador ti DOE a kitaen ti agdama nga imbentaryo ken panagpresyo dagiti lokal a kompania ti Langis tapno masigurado a saan a nalabes ti nguminaan ti presio.
