VIGAN CITY – Sangapulo ket uppat a ribo a pisos iti mapapati nga intaray dagiti dua a saan pay nabigbig a lallaki a nanghold-up kadagiti dua a babbai nga agbanbantay ti Harry’s gasoline station idiay Guimod Sur, San Juan idi September 11.
Segun ti maysa kadagiti agbanbantay iti nasao a paggasolinaan a ni Lina Battad a taga- Barbarit, Magsingal, dua a naka-abungot ken nakahelmet a lallaki iti immasideg kadakuada ken ti kadua na ket pinaturungan da ida iti paltog sa da indeklerar ti hold-up.
Gapu iti buteng da, sinurot da amin nga inbaga dagiti suspek ket inted da dagiti naglakoan da iti nagmalem.
Awan iti sabali a nakakita iti pasamak ta inrana dagiti suspek nga awan iti agpagpagasolina ken awan ti guwardiya da ta alas syete ti rabii pay laeng ti duty na.
Inbuksilan ni Battad a sakbay iti pasamak ket mamindua a daras a nagsubli-subli iti national highway dagiti suspek ket iti maikatlo a panagsubli da, isun iti pananghold-up da kadakuada.
Adda ti CCTV iti pasdek ngem idi rabii ket marigatan dagiti otoridad a mang-operate agsipud ta awan ti operator na ken advance pay iti oras na nu ikumperar iti actual nga oras.
Ti agdama, agtultuloy pay laeng iti imbestigasyon dagiti otoridad inaig iti pasamak tapnu mabigbig nu siasino dagiti suspek.
