Idurduron manen ni Senate President Pro Tempore Panfilo “Ping” Lacson ti gakat a gagemna a papigsaen ken aramiden a baro ti linteg kontra iti espionage babaen iti nadagdagsen a dusa ken pannakairaman kadagiti baro a panag-espiya babaen ti modern technology.
Segun ken ni Lacson, nabayagen nga impila na ti gakat ngem agtaltalinaed latta a nakapenpen iti Senado ket ita ket gagem na nga i-update ti anti-espionage law.
Iti salinong ti gakat, mabalin a mapatawan ti life imprisonment wenno tungpal biag a pannakaibalud nga awan ti parole ket multa a P5 milyon agingga P20 milyon.
Nagpanawagan ti opisial ti nainginget a dusa kontra it espionage kasaruno dagiti maipagarup nga aktibidad dagiti gangannaet a tumar-target kadagiti sensitibo nga impormasion iti estado ti pagilian.
