Inisponsoranen iti plenaryo ni Senador Robinhood Padilla ti gakat a Child Online Safety and Protection Act a ti gagemna ket salwadan dagiti agtutubo kontra iti peggad nga itunda ti panagaramat iti social media.
Iti sponsorship ni Padilla a Chairperson ti Senate Committee on Public Information and Mass Media, gagem ti gakat a mangituding iti minimum age para iti panagaramat iti social media ken obligaren dagiti social media platform a mangipatungpal kadagiti addang a mangsalwad kadagiti agtutubo kontra iti cyberbullying, exploitation, harmful content ken dadduma pay nga online risks.
Inlawlawag ni Padilla a ti gakat ket para iti nataltalged ken naresresponsable a digital a masangwanan kadagiti agtutubo ken saan ket a tapno ikkaten ti karbengan dagiti agtutubo nga agar-aramat iti teknolohia.
Iti salinong ti gakat, maituding iti 16 a tawen ti minimum age dagiti agtutubo a maaddaan iti social media account.
