Nangipila ni Bukidnon 3rd District Rep. Audrey Kay Zubiri iti gakat a mangiraman iti financial literacy kas core subject iti junior ken senior high school.
Ti House Bill No 6091 wenno Financial Education and Literacy Act ket gagemna a sulbaren ti kumarkaro a panagutang dagiti Pilipino.
Maibasar iti World Bank, 47.1 percent kadagiti nataengan a Pilipino ti agut-utang idinto a 19 percent laeng ti awan utangna.
Innayonna a nangatngato ti financial literacy dagiti agtutubo nga agtawen iti 18-39 no ikumpara kadagiti nataengan, isu a napateg ti nasapa a pannakaisuro ti husto a panangiggem iti kuarta.
Inlawlawag ti kongresista a ti financial education ket makatulong iti panangliklik iti panangnamnama iti gobierno, panangpatibker iti pamilia, ken panagisuro iti kultura a responsable a panangiggem iti kuarta.
