Gakat a mangipaay iti balon kadagiti estudiante iti pampubliko a pagadalan, singasing ti maysa a kongresista

Idurduron ni Cavite 1^st District Rep. Jolo Revilla a maikkan iti balon dagiti estudiante kadagiti pampubliko a pagadalan tapno maaddaan ida iti pigsa ken pokus nga agadal.

Iti House Bill 85 wenno ti ‘Baon Para sa Scholar ng Bayan Act’ ket kayat ni Revilla a maikkan iti P1,000 kada tawen dagiti agad-adal iti Kindergarten agingga Grade 8 idinto a P2,000 kada tawen dagiti Grade 9 to 12 student.

Mabilin ti Department of Education a mangbukel iti programa ken monitoring system para iti husto a pannakaiwaras ti tulong kas maisurot iti Data Privacy Act.

Mamati ti kongresista a no masigurado nga adda balon ti kada estudiante ket ad-adda a maksayan ti bilang dagiti agtutubo a mapilitan nga agsardeng nga agadal gapu iti kinakurang iti magasto.