Inaprubaran ti House of Representatives iti maikatlo ken maudi a panangibasa ti House Bill No 11430, wenno ti ‘Declaration of State of Imminent Disaster Act.
Gagem ti gakat a maipaayan iti mekanismo ken pagibasaran iti panangideklarar iti ‘state of imminent disaster’ tapno mapadaras ti panangresponde ti komunidad kadagiti didigra, natural man wenno aramid ti tao.
Segun ken ni Speaker Ferdinand Martin Romualdez, kangrunaan a nangputar iti gakat, ti linteg ti mangted turay iti presidente, dagiti gobernadora, ken dagiti mayor a mangideklarar iti nasao nga estado kadagiti kangrunaan a lugar maibasar iti singasing ti National Disaster and Management Council wenno ti lokal a DRRM council.
Iti salinong ti House Bill 11430, adda dagiti addang kas ti preemptive evacuation, panagurnong kadagiti relief goods, ken pannakailatang ti pondo tapno masungbatan dagiti pagkasapulan kadagiti apektado a komunidad sakbay ti didigra.
