Inallukoy ni Senador Raffy Tulfo ti insigida a panang-aprubar iti Senado ti gakat a “Bagong Balikbayan Act” wenno Senate Bill No. 1839.
Impaganetget ni Tulfo a gapu iti riribok idiay Middle East ket mapatta-patta a 2.44 million nga Overseas Filipino Workers (OFWs) ti posible a ma-displace, mapukawan iti trabaho ken mapilitan nga agawid iti Pilipinas.
Kinunana a no makasubli iti pagilian dagiti OFW, napateg nga adda naurnos nga integration program iti gobierno tapno matulonganda a makarugi manen ken makapadur-as iti pagbiagan.
Karaman dagiti priority measure iti salinong ti Legislative-Executive Development Advisory Council (LEDAC) ti maawagan a National reintegration Bill isu a napateg a maipasa dayta iti kabiitan a panawen nangruna iti agdama a sitwasyon dagiti OFW nga apektado iti krisis iti rehiyon.
