VIGAN CITY – Ad-adalenen ti Gabriela Partylist no ania ti kaso a mabalinda nga ipila kontra iti military official a ni Lt. Gen. Antonio Parlade Jr. a nangbigbig kadakuada a kameng dagiti terorista.
Iti pannaki-uman ti Bombo Radyo Vigan ken ni Rep. Arlene Brosas, mangal-aladan ti detalye ken pagpapatangandan no kasano iti legal a wagas nga aramidenda kontra iti nasao nga opisial ken nagyaman kadagiti mangsupsuporta iti grupo.
Inlawlawag ni Brosas a ti kangrunaan a gagemda ket maital-o ti karbengan dagiti umili ta awan iti aniaman a pork barrel fund nga al-alaenda iti kongreso ken saanda nga agpabpabayad ta ti pudno ket isuda ti grupo nga agipaspasa iti adun a gakat a ti gagemna ket mapasayaat ti biag dagiti umili ken mailaban ti karbenganda.
Kabayatanna, dayawen ti kongresista dagiti tallo a celebrity a da Angel Locsin, Liza Soberano ken ni Catriona Gray a nairaman iti red tagging gapu iti panangilabanda iti karbengan dagiti babai ken ubbing.
Makitinnulong ti grupo kadagiti tallo a celebrity tapno maikalinteganda iti bagida kadagiti madi a panangbababalaw kadakuada iti laksid dagiti nasayaat a platapormada iti pagilian.
