10.88 grams ti napagango a bulong ti marijuana nga aggatad iti nasurok sangaribo a pisos ti nakumpiskar manipud iti maysa a fish vendor a nakemmeg iti naiwayat a buy-bust operation iti ili ti Sta. Cruz.
Ti suspek ket agtawen iti tallopulo ket pito, agnaed iti nasao nga ili.
Iti pannaki-uman ti Bombo Radyo Vigan ken ni Police Major Paul Vincent Tadeo, inkalintegan ti suspek ti panagaramatna iti marijuana kas agas iti gout-na ngem inaminna met laeng nga agilaklako.
Nakumpiskar kenkuana ti aggatad iti P1,305.60 a bulong ti marijuana nga agdagsen iti 10.88 grams a naikabil iti maysa a heat-sealed transparent plastic sachet a nagserbi kas buy-bust item.
Dagiti non-drug evidence ket pakairamanan ti maysa a bassit a tubular glass tube a naglaon iti mapapati a residue ti marijuana, coin purse, lighter, cellphone, ken genuine P500.
