Nagpanawagan ti Federation of Free Workers ken ni Presidente Ferdinand Marcos Jr a mangisayangkat iti National Summit tapno mapagpapatangan dagiti nadumaduma a sektor dagiti pakaseknanda ita a sumangsango ti pagilian iti krisis.
Iti pannaki-uman ti Bombo Radyo Vigan ken ni President Sonny Matula, nasken a mairaman dagiti nadumaduma a sektor kas kadagiti union, employer ken dadduma pay nga organisasion iti konsultasyon ta no gobierno laeng ti agpapatang ket adu dagiti maliwayanda ken adu ti mabati.
Kunana nga uray no kasano kasayaat dagiti gakat nga ar-aramiden dagiti agpampanday-linteg no awan ti pannakipaset dagiti umili ket saan nga agbalin nga epektibo ken amangan no saan a maipakaawat a nasayaat.
Kabayatanna, ladingiten ni Matula a saan a nadanon dagiti minimum wage earner iti ayuda ti gobierno nangruna ita nga agrigrigat dagiti umili.
Innayonna a kaaduan kadagiti mangmangged ket awan ti naawatda nga ayuda manipud iti gobierno iti baet a nangina dagiti magatang ken ti produkto-petrolyo.
