Nagpanawagan ni Philippine National Police Chief Police General Rommel Marbil kadagiti dati a PNP chief nga ilawlawagda iti pannakainaigda ti drug war ni dati a President Rodrigo Duterte kasaruno ti panangamin ni retired police colonel Royina Garma iti reward system para iti panangpapatay kadagiti drug suspects.
Segun ken ni Marbil, imbestigaranda ti imbagana ni Garma tapno masigurado ti accountability ken transparency kadagiti ranggoda.
Immunan nga imbutaktak ni Garma a kiniddaw kenkuana ni Duterte a mangkita ti opisyal a mangipatungpal ti Davao model iti drug war iti national scale, maysa a sistema pakaipaayan ti gungguna nga agingga P1 million para iti makapatay iti drug suspets.
Iti affidavit, inamin ni Garma a karaman kadagiti nainaig iti implementasyon ti kampania ket da Senator Christopher “Bong” Go ken dati a National Police Commission commissioner Edilberto Leonardo.
Kabayatanna impakaammo ni Marbil nga implementar ti PNP iti pagannurotan a mangpapigsa ti public confidence ken panangliklik ti kas met laeng a panagabuso iti masangwanan nga operasyon.
