Nakasaganan a tumestigo ni dati a Philippine Charity Sweepstakes Office (PCSO) General Manager Royina Garma kontra ken ni dati a President Rodrigo Duterte iti International Criminal Court (ICC).
Dayta iti pinasingkedan ni Department of Justice Secretary Jesus Crispin Remulla kalpasan a kinumpirmaran iti Bureau of Immigration (BI) a nagsubli iti pagilian ni Garma sakbay iti panagturongna idiay Malaysia.
Segun ken ni Remulla, addan iti nasao a pagilian ni Garma tapno makisarita kadagiti mangibagi iti ICC.
Ni dati a Senator Antonio Trillanes IV iti mapapati a nagserbi a rangtay iti panagpatang ni Garma ken iti ICC ken nakasagana laeng iti DOJ a salakniban dagiti agtestigo.
Manamnama a karaman a witness ni Garma iti maisayangkat a confirmation of charges iti ICC kontra iti dati a presidente.
Ni garma iti kangatoan nga opisyal iti dati nga administrasyon a nangkumpirmar iti mapapati a reward system iti kampania kontra iti illegal a droga nga inrusat ni Duterte.
