Target ti Kamara nga irruar ti gakat a mangrisut iti problema ti panagngato ti presio ti langis iti panagsubli ti session inton Mayo 4.
Idauloan ti Legislative Energy Action Development (LEAD) Council, a buklen ti sangapulo ket tallo a komite, tapno pagtiponen ti dagus a solusion ken napaot a reporma iti tengnga ti krisis ti enerhiya.
Segun ken ni Marikina Rep. Miro Quimbo, agtultuloy ti panagdenggeg uray naka-break ti Kongreso tapno masigurado nga adda konkreto nga addang inton agsubli ti session.
Karaman iti maisingsingasing ti addang a panangited ti insentibo para iti electric vehicles (EVs) ken dadduma pay a sustainable transport options, uray pay ti panangawis iti pribado a sektor nga agpuonan kadagiti alternatibo iti fossil fuel.
Gagem pay ti gakat a maikkatan ti panagbalin a vulnerable ti pagilian iti panagngato ti presio ti langis iti world market.
