Impannakkel ti Malakanyang nga adda iti husto a direksyon ti ekonomia iti pagilian isu nga agtaltalinaed a naregta ken positibo a taray iti ekonomia iti salinong ti administrasyon ni Pres. Ferdinand Marcos Jr.
Segun ken ni Palace Press Officer USec. Claire Castro, dakkel a tulong dagiti naipatungpal a reporma iti ekonomia iti administrasyon.
Dayta ket maibasar iti inreport ti economic team iti presidente iti napasamak a 7th Economy and Development Council Meeting idiay Malakanyang.
Impanakkel nga impakaammo ni Castro a bimmaba ti unemployment rate manipod 10.3% idi 2020 a nagbalin a 4.7% idi 2025 idinto a ti underemployment rate ket bimmaba iti 16.2% a nagturong iti 13.6% idi napan a tawen a mangipasimudaag iti panagado iti mayannatup ken disente a trabaho para kadagiti Pilipino.
Impaganetget ti Palace official nga ipakpakita dagiti numero nga epektibo dagiti programa iti gobierno iti panagaramid iti trabaho ken panagkissay iti kinarigat.
Maibasar iti listaan, bimmaba pay iti 2.4 million a tattao ti bilang dagiti marigrigat manipod 2021 agingga 2023 idinto nga agtaltalinaed a manageable iti inflation rate iti pagilian.
Nainget latta ti bilin ti presidente kadagiti concerened government agencies a tignayan ti flood control issues, climate change ken dadduma pay a karit kagiddan iti naur-urnos a panagaramat ti pondo iti pagilian ken napigpigsa a pannakikammayet iti ekonomia iti ASEAN.
