Kaso a theft ti sangwen dagiti dua a lalaki a nagtakaw iti copper wire iti uneg iti Sta. Maria Cockpit Arena, Barangay Suso, Sta. Maria, Ilocos Sur
Ti biktima ket negosyante nga agtawen iti limapulo ket lima, naasawaan nga agnaed iti nasao nga ili idinto a dagiti suspek ket agkabagyan nga agpada nga agtawen iti sangapulo ket walo nga agnaed met laeng iti nasao nga ili.
Iti pannaki-uman ti Bombo Radyo Vigan ken ni PLt. Jenson Refuerzo nga Officer-in-Charge iti Sta. Maria Municipal Police Station, nagresponde dagiti pannakabagi ti linteg kalpasan iti pannakaawatda iti report a natakaw iti nasurok-kumurang 126 meters iti #22 copper wire nga aggatad iti P48,000 iti galyeraan.
Segun ken ni Refuerzo, iti panangkitada iti CCTV footage kaduada ti biktima ken maysa pay a personnel-na ket nabigbigda dagiti suspek nga empleado met laeng iti nasao a cockpit arena.
Naisayangkat iti hot pursuit operation a nakakemmegan ti maysa a suspek idinto a ti maysa ket boluntaryo a simmuko iti Sta. Maria Municipal Police Station babaen iti panangkuyog ti nagannakna.
Naduktalan nga idi rabii iti December 8, 2025 a napasamak iti panagtakawan ket dagus a nailako dagiti copper wire.
No pay kasta ket kinuna ni Refuerzo nga agbabawi dagiti suspek iti inaramidda ta naapektaranen iti pagbiaganda.
Kabayatanna, kinuna met ti biktima nga idi pay laeng ket mapukpukawanen iti copper wire isu nga inkeddengna a maaddaan iti CCTV tapno maammoanna no siasino dagiti agal-ala.
