Dua ti nakemmeg gapu iti swindling/estafa ken panaglabsing iti Article 168 ti Revised Penal Code wenno ti Illegal Possession of False Treasury or Bank Notes idiay Barangay Bio, Tagudin, Ilocos Sur.
Nabigbig dagiti suspek a da Norjana Maguid Gumbay, agtawen iti uppat a pulo ket dua, taga-Barangay 169 Paz Ville, Lagundi, Mexico, Pampanga ken ni Jeremy Billones Elorza, agtawen iti duapulo ket uppat, taga-578 Lovely Street Cupang, Muntinlupa City.
Dagiti biktima ket da Leah Ferrer Manzano, agtawen iti duapulo ket innem, Barangay Treasurer ken ni Edrian Dave Rabago, agtawen iti duapulo, agpada a taga-San Nicolas, Candon City.
Nagreport dagiti biktima iti Sta. Lucia Police Station a biktimada iti nasao a panaglabsing ket dagus met a nangisayangkat dagiti pannakabagi ti linteg iti hot pursuit operation kadua dagiti biktima ken dagiti personnel a naideploy iti Tagudin border, Barangay Bio ket nangisayangkatda met iti dragnet operations.
Nakemmeg dagiti suspek iti Tagudin border ket nakumpiskar kadakuada ti PHP36, RELX battery nga adda 2 pods na, tulbek ti Hyundai car, sling bag, innem a nadumaduma a dokumento, national ID, OR/CR ti motorsiklo, dua a singko pesos, Aquinoa lechon sticker, tallopulo ket pito a piraso ti one-thousand-peso bill a mapapati a peke a kuarta ken maysa a Hyundai Accent.
