VIGAN CITY – Nadunor ti rupa ti maysa a senior citizen ta pinang-or ti padana a senior citizen idiay Brgy. Pantay Tamurong, Caoayan.
Iti pannaki-uman ti Bombo Radyo Vigan ken ni PCapt Henry Garcia iti Caoayan Municipal Police Station, adda iti saan a nagkinnawatan bayat iti panaginom iti arak da Virgilio Nieva, agtawen ti pitopulo, balo, awanan trabaho ken ni Alfredo De Peralta, agtawen ti innem a pulo ket innem, naasawaan, security guard nga agpada nga agnaed iti nasao a lugar isu a dinangran ni De Peralta ni Nieva.
Segun ken ni Garcia, gapu ta saanda a nagkinnawatan ket nangala ni De Peralta ti bote iti arak idinto a nangala iti kayo ti kawayan ni Nieva ket nagkinnabilda ngem naipati ni De Peralta iti bote iti rupa ni Nieva a gappuanan iti pannakadunorna.
Naipan ni Nieva iti Ilocos Sur Provincial Hospital Gabriela Silang para iti naan-anay a pannakatamingna idinto a ni De Peralta ket naipanen iti kustodiya dagiti pannakabagi ti linteg tapno dumalan ti usto a proseso.
