Pinadayawan ti Armed Forces of the Philippines dagiti dua a piloto ti Philippine Air Force Fa-50PH fighter jet kalpasan a nasarakan dagiti bangkayda ken ti nadadael nga eroplano idiay Mount Kalatungan range idiay Bukidnon.
Immuna a naipakaammo a mapukpukaw da Maj. Jude Salang-oy ken 1Lt. April John Dadulla kalpasan a timmayab ti eroplanoda manipud idiay Mactan, Cebu idi Marso 4 para iti maysa a misyon ti suporta kontra kadagiti rebelde a komunista.
Nasarakan ti nadadael nga eroplano iti nagbeddengan ti Pangantucan ken Talakag.
Binilin ti 1st Special Forces Battalion ti 403rd Infrantry Brigade nga alaen dagiti bangkay a maipan iti landing zone ken i-airlift ti maysa a PAF helicopter.
Ni Salang-oy ket delegado iti 2023 International Aerospace Symposium idiay South Korea, idinto a ni Dadulla ket tubo idiay Fortich, Bukidnon.
