VIGAN CITY – Maysa a plastic a naglaon iti mapapati a shabu ken adda markana a Chinese ti nasarakan dagiti dua a mangngalap idiay Barangay Daclapan, Cabugao, Ilocos Sur.
Dagiti mangngalap ket da Froilan Andres Agutos, agtawen iti tallopulo ket siam, ken ni Edzel Andres Naval, agtawen iti tallopulo ket uppat, agpada nga agnaed iti nasao a lugar.
Alas syete singkwenta idi kalman (June 29), nakaawat ti tawag ti Cabugao Police Station manipud iti maysa a concern citizen nga adda maysa a transparent plastic a nagmaris iti aqua blue nga adda Chinese markingsna ti nasarakan iti taaw dagiti mangngalap.
Alas kuatro y media iti malem iti isu met laeng a petsa, agkalkalap dagiti nasao a mangngalap iti ikan, sangapulo ket tallo a milya ti kaadayona manipud iti shoreline idi nakitada ti nasao a pakete a tumtumpaw iti kabaybayan.
Dagus nga innalada dagiti kontrabando ken intakdangda sa intawagda kadagiti pannakabagi ti linteg.
