Dua a nagmaneho iti motorsiklo, nagsinnapgid idiay Bantay, nadundunor

VIGAN CITY – Dua a nagmaneho iti motorsiklo ti nadundunor ta nagsinnagidda idiay Barangay Puspus, Bantay.

Nabigbig dagiti nadundunor a da Noriel Marcellana, agtawen ti tallo pulo ket walo, naasawaan nga agnaed idiay Camit Taal Batangas a nagmaneho ti Honda Wave kenni Daryll Cariño, agtawen ti dua pulo ket dua, naasawaan nga agnaed idiay Sinabaan, Bantay a nagmaneho ti Suzuki Raider.

Maibasar iti inisyal nga imbestigasyon ti Bantay Municipal Police Station, agpapadaya a direksyon dagiti dua idi mapapati a nasagid ni Cariño ni Marcellana isu a nadundunor da.

Agsipud iti dayta, naipan dagiti dua iti ospital para iti pannakatamingda ngem ni Marcellana ket nakaruwar met laeng nga insigida idiay ospital idinto a ni Cariño ket nagbati ken nai-confine idiay ospital ta nakarkaro ti dunor a sinagaba na gapu iti aksidente.