VIGAN CITY – Nadunor ti akin-kannawan a luppo ti nagmaneho ti motorsiklo idinto a nagsagaba ti minor injury ti back ride na gapu ti pannakadungparda ti maysa nga SUV iti national highway idiay Barangay Poblacion East, San Ildefonso, Ilocos Sur.
Ti nagmaneho ti color black/red a Suzuki Raider 150 a motorsiklo ket ni Excelsis Cortes Fuller, agtawen iti duapulo, baro, nga agnaed idiay Barangay Napo, Magsingal, nagaramat ti helmet, holder ti Driver’s License ket kaduana ti back ride na a ni Wilmart Bayani Urate, agtawen iti duapulo, baro, nagaramat ti helmet nga agnaed idiay Barangay Pagsanaan Sur, Magsingal idinto a ti nagmaneho ti color black Toyota Rav4 ket ni Alfonso Quilala Salvador Jr., agtawen iti limapulo ket lima, balo, holder ti Californian Driver’s License nga agnaed idiay Barangay Bannuar, San Juan, Ilocos Sur.
Sakbay iti insidente ket adda iti outer lane ti SUV a nakasango iti Fladez Construction Supply ken nagsignal tapno agsikko.
Apaman a nakaballasiw ti SUV iti highway ket dimteng ti napaspas a patarayna a motorsiklo nga agpabagatan a direksyon isu a naidungpar iti SUV a gappuanan ti pannakadunor dagiti nagkalugan iti motorsiklo.
Agpada a naipan iti Northside Doctors Hospital, Guimod, Bantay ti driver ti motorsiklo ken back ride babaen kadagiti nagresponde a kameng ti Philippine National Police ken Rural Health Unit para ti pannkatamingda idinto a saan a naan-ano ti driver ti SUV.
