VIGAN CITY – Naideklerar a dead on arrival idiay Magsingal District Hospital ti babai nga agtawen iti sangapulo ket uppat a taga-Utol Patac, San Ildefonso a nalmes iti baybay idiay Pagsanaan Sur, Magsingal idi kalman, March 24.
Kabayatanna, nasarakanen iti kadua ti biktima nga agtawen iti sangapulo ket tallo a taga-Gongogong, San Ildefonso, Ilocos Sur.
Segun ken ni Magsingal Fire Marshall Senior Fire Officer 2 Richard Garcia, nakapagpaarayat nga insigida dagiti kakadua dagiti dua a menor de edad idi nakita dan a malmalmes da ket insigida met a nagresponde dagiti agnaed nga asideg iti nasao a lugar ngem nadawel ti baybay isu a saan nga insigida a naisalakan ida.
Mapapati a nagiinom ti arak dagiti biktima idi napan da nagpipicnic iti nasao a lugar.
Inladawan met ni Gongogong, San Ildefonso Brgy. Chairman Ansang Fetalvero ti maysa kadagiti biktima a nasingpet ken nasirib nga ubing.
